一年前經過娛樂百份百接觸呢隻遊戲，
由覺得啲女好靚直到對呢個遊戲沉迷，
每星期睇直播成為我到而家嘅最愛活動。
以前睇過好多乜嘢三國殺同其他殺，
但我從來都無玩過，
直到遇到狼人殺，
好多人話「乜你咁遲先玩？」之類嘅廢話我都放埋一邊，
因為玩先玩後同我玩呢個遊戲有咩關係？
中意玩呢個遊戲，係因為簡單幾個角色可以做出唔同變化，
憑住邏輯、口材、戰術同默契做出唔同嘅效果，
有時成功有時敗，但最後大家都會嘻嘻哈哈和氣收場。
上年運動期間有稍稍回落過一段時間，
好多朋友都無心情同時間玩，
喺呢段時間我決定做一個狼人殺嘅Youtube節目，
做娛樂同創作嘅人大概只可以用呢兩樣嘢去獻俾香港人，
希望日子點樣過，都可以喺當中搵到一啲快樂，
所以搵咗一班志同道合嘅朋友去做件事。
遊戲出街三集，收到好多朋友意見，
開始明白娛百入面所講壓力問題，
好多人成日都用「最勁」方向出發，
但其實點樣為之最勁，
我哋呢班人理解唔到亦都接觸唔到，
因為大家各有各忙，圍埋一齊玩個遊戲已經好滿足，
拍到出嚟大家可以笑一笑已經係超額。
呢個Channel入面嘅只係用娛樂包裝嘅狼人殺，
係唔係高玩，係唔係根正苗紅對我嚟講唔係首要，
最緊要係一班朋友唔使受太大壓力，
好好Enjoy我一年前玩呢個遊戲時嘅快樂就夠。
如果中意嘅朋友，
可以follow下多多支持，
每星期都會有一集，
玩得唔好多多見諒，
睇得快樂感謝欣賞。
Search